Hólmar Örn: Vantar meiri skynsemi

„Við höfum gert of mikið af jafnteflum og miðað við hvernig þessi leikur spilaðist, sérstaklega fyrri hálfleikurinn, þá hefði ég viljað fá þrjú stig," sagði Hólmar Örn Rúnarsson, fyrirliði Keflavíkur, eftir 3-3 jafnteflið gegn Fjölni í dag.

Keflvíkingum hefur gengið illa á útivöllum en síðast unnu þeir útileik í deildinni í september í fyrra. Sá leikur var á Fjölnisvelli. Liðinu hefur gengið ansi brösuglega að undanförnu.

„Það hefur verið uppgangur hjá okkur eftir skellina gegn Fram og Breiðabliki. Það vantar bara að klára þessa leiki. Það vantar meiri skynsemi í varnarleikinn þegar við erum komnir yfir. Við ætlum að sækja og vera flottir en er refsað fyrir það," sagði Hólmar.

Varnarleikur Keflavíkur í dag var hrikalega dapur. „Við missum boltann of oft á slæmum stöðum. Þá ná þeir að stinga innfyrir vörnina okkar. Þá lítur aftasta lína illa út. Við sem erum framar á vellinum þurfum að vera skynsamari og megum ekki tapa boltanum eins og hálfvitar á miðjum vellinum."

En hvað er markmið Keflavíkur í þeim leikjum sem eftir eru? „Við ætlum að klára þessa deild með sæmd og klára bikarinn," sagði Hólmar Örn Rúnarsson.