Friðsöm mótmæli á Akureyri

Liðlega 200 manns komu saman í friðsömum mótmælum á Ráðhústorginu á Akureyri í dag, samkvæmt upplýsingum frá lögreglunni.

„Þetta gekk mjög vel og það var mjög góð mæting og góðar ræður," segir Guðrún Þórs, einn skipuleggjenda mótmælanna. Hún segir að á tímum sem þessum skipti máli að koma saman, sýna samstöðu og sjá tækifærin sem séu að skapast.

Guðrún segir að þema fundarins hafi verið menntakerfið og að þeir Ragnar Sigurðsson formaður Félags stúdenta við Háskólann á Akureyri og Þráinn Karlsson leikari hafi flutt athyglisverðar ræður. Guðrún býst við því að mótmælt verði aftur að viku liðinni en hún viti ekki til þess að búið sé að ákveða málefni þess fundar.