Framkvæmdastjóri Samfylkingarinnar krefst breytinga

Ríkisstjórnin þarf að gera nýjan sáttmála við þjóðina, að mati Skúla Helgasonar framkvæmdastjóra Samfylkingarinnar. Hann vill breytingar á ráðherraskipan ríkisstjórnarinnar og uppstokkun innan Seðlabankans og Fjármálaeftirlitsins.

Skúli segir að ríkisstjórnin þurfi í fyrsta lagi að sýna fram á með áþreifanlegum hætti að hún skilji óánægju þjóðar sinnar, taki mark á henni og sé reiðubúin að bregðast við með breytingum sem um munar.

Breytingar á ríkisstjórn, FME og Seðlabanka

,,Þær þurfa að fela í sér uppstokkun innan Seðlabanka Íslands og Fjármálaeftirlitsins, breytingar á skipan ríkisstjórnarinnar, verkaskiptingu innan hennar, en líka siðbót, sem felur í sér meira gagnsæi og virðingu í verki fyrir pólitísku siðferði," segir Skúli í grein á vefsíðu Samfylkingarinnar. Trúnaður við þjóðina hafi beðið hnekki og það útheimti verulegt átak að endurvinna traust þjóðarinnar.

Siðareglur og endurskoðuð lög um ráðherraábyrgð

Skúli segir mikilvægt að samþykktar verði siðareglur sem meðal annars komi í veg fyrir óeðlileg hagsmunatengsl þingmanna og annarra ráðamanna við hagsmunaaðila. Þá telur hann þörf á að endurskoða lög um ráðherraábyrgð og þrígreining ríkisvaldsins verði styrkt.

Aðildarumsókn og skýr atvinnustefna

,,Þá þarf að gefa þjóðinni skýr fyrirheit um framtíðina, ákvörðun um aðildarumsókn að Evrópusambandinu skiptir þar verulegu máli en jafnframt þarf að móta nýja atvinnustefnu, hefja markvissa gagnsókn gegn atvinnuleysinu, forgangsraða í þágu velferðarþjónustu og almannahagsmuna í ríkisfjármálum og leggja fram raunhæfar tillögur um sparnað í ríkiskerfinu sem fékk að blása út í góðærinu," segir Skúli.

Grein Skúla er hægt að lesa hér.