Grunaðir um innflutning á amfetamíni í kílóavís

Fjórir karlar hafa verið úrskurðaðir í gæsluvarðhald til 24. september að kröfu lögreglunnar á höfuðborgarsvæðinu. Samkvæmt upplýsingum fréttastofu varðar málið innflutning á hvítu efni í kílóavís, sem líklegast er amfetamín. Upplýsingar um nákvæmt magn liggja ekki fyrir. Samkvæmt upplýsingum frá lögreglunni voru efnin flutt hingað til lands frá Danmörku.

Þrír mannanna sem handteknir hafa verið eru á þrítugsaldri og einn undir tvítugu. Samkvæmt upplýsingum frá lögreglunni hefur málið verið unnið í samvinnu við dönsk lögregluyfirvöld en nokkur önnur lögregluembætti hérlendsins auk tollyfirvalda hafa átt aðkomu að rannsókninni.

Samkvæmt heimildum fréttastofu hafa hinir handteknu ekki áður komið við sögu lögreglunnar.