Aksturstími til Ísafjarðar styttist um eina og hálfa klukkstund

Um leið og Kristján L. Möller klippti á borðann heyrðu síðustu malarkaflarnir á Djúpvegi sögunni til. Fjölmenni fagnaði enda eru að verða þáttaskil í vegamálum Vestfirðinga. 72ja kílómetra stytting vetrarleiðar fæst með brúnni og tengdum vegum, sem og nýju leiðinni sem opnast um Arnkötludal síðar í mánuðinum, en þar með verður komið langþráð bundið slitlag alla leið milli norðanverðra Vestfjarða og annarra landshluta.

Halldór Halldórsson, bæjarstjóri Ísafjarðarbæjar, segir þetta mikla samgöngubyltingu, sérstaklega fyrir norðanverða Vestfirði en einnig fyrir alla Vestfirðinga og alla landsmenn. Hann áætlar að vetrarakstur milli Ísafjarðar og Reykjavíkur styttist um eina og hálfa klukkustund og sumarakstur um 20-30 mínútur.

Vestfirðingar telja sig þó enn sitja á hakanum í vegamálum. Halldór minnir á að árið 1997 hafi menn áætlað að aðalleiðir á Vestfjörðum yrðu komnar í gott lag árið 2007, þar með leiðin um Barðastrandasýslu. Núna, árið 2009, sé ennþá töluvert mikið eftir.