Rannsókn lögreglu á íkveikju gagnrýnd

Hörð gagnrýni kom fram á störf rannsóknarlögreglu á íkveikju á Kleppsvegi fyrir héraðsdómi Reykjavíkur í morgun. Aðalmeðferð málsins var framhaldið í morgun en upphaflega stóð til að kveða upp dóm í málinu þann 11. ágúst.

Þrír menn eru ákærðir fyrir að hafa kveikt í húsi að Kleppsvegi 102, aðfaranótt laugardagsins 6. júní í sumar. Rannsóknarlögreglumenn sem stýrðu rannsókninni sátu fyrir svörum í héraðsdómi í morgun og kom þar fram gagnrýni á þeirra störf. Gagnrýnt var að ekki voru tekin fingraför af bensínbrúsa og kveikjara sem fundust á staðnum. Þá var einnig gagnrýnt að verjendur sakborninga fengu ekki í hendur upptökur af yfirheyrslum lögreglu.

Rannsóknarlögreglumaðurinn sem stýrði rannsókn málsins kom fyrir dóminn og var hann spurður um dráttinn á afhendingu gagnanna. Sagði hann að svo nýlega væri farið að taka yfirheyrslur upp með hljóði og mynd að verkferlar hefðu ekki verið útbúnir í þessum efnum.

Ákæruvaldið og verjendur fluttu að lokum sín lokaávörp þar sem litlu var bætt við fyrri ræður. Pétur Guðgeirsson, dómari í málinu, sagði að dæmt yrði í málinu á næstu dögum.