Pólsku þjófarnir áfram í gæsluvarðhald

Hæstiréttur úrskurðaði í dag þrjá Pólverja í gæsluvarðhald til 4.september en þeir höfðu allir kært úrskurð héraðsdóms. Pólverjarnir eru taldir tilheyra skipulögðu gengi innbrotsþjófa sem grunað er um að hafa brotist inn á hundruð heimila síðustu vikur og mánuði. Lögreglan rannskar hvort þýfinu hafi verið smyglað úr landi.

Líkt og Vísir hefur áður sagt frá hefur mikil innbrotaalda skollið á höfuðborgarsvæðinu, en meira en 250 innbrot eru framin í hverjum mánuði sem er mikil aukning frá fyrri árum.

Grunur leikur á að stór hluti þessara innbrota séu framin af skipulögðum hóp pólskra ríkisborgara sem búsettir eru hér á landi. Samkvæmt upplýsingum fréttastofu hefur lögreglan smám saman verið að kortleggja þennan hóp en þessi þrír aðilar voru handteknir um miðjan ágúst.