Þýðir ekkert fyrir Steingrím að skæla

Einar K. Guðfinnsson, þingmaður Sjálfstæðisflokksins og fyrrverandi ráðherra, segir að Vinstri græn séu jafn ábyrg fyrir aðildarumsókn að Evrópusambandinu og Samfylkingin. Ekki þýði fyrir Steingrím J. Sigfússon, formann VG, að skæla yfir örlögum sínum.

Steingrímur sagði í viðtali við Morgunblaðið í gær að aðildarumsóknin að Evrópusambandinu væri langerfiðasta málið sem hann hafi staðið frammi fyrir eftir að hann tók sæti í ríkisstjórn. Evrópumálin hafi til að mynda verið mun erfiðaðri en Icesave-málið.

Einar segir í pistli á heimasíðu sinni að það þýði ekkert fyrir Steingrím að skæla yfir örlögum sínum í ESB-málinu. Hann hafi kosið sér þetta hlutskipti sjálfur. „ESB umsóknin var aðgöngumiðinn sem hann varð að reiða fram til þess að geta fengið pláss við ríkisstjórnarborðið."

Steingrímur getur ekkert snúið sér nema að sjálfum sér sé hann svekktur, að mati Einars. „Vinstri grænir eru jafn ábyrgir fyrir ESB umsókninni og Samfylkingin. ESB umsókn er jafnt í boði VG og Samfylkingar."

Pistil Einars er hægt að lesa hér.