Neitar að gefa saman svart/hvít pör

Friðardómari í Louisiana í Bandaríkjunum hefur neitað að gefa saman svartan mann og hvíta konu af umhyggju fyrir börnum sem þau kunna að eignast.

Keith Bardwell segir fráleitt að hann sé rasisti, hann hafi oft gefið saman svört pör heima hjá sér.

Eftir að hafa rætt málið við bæði svart fólk og hvítt hafi hann hinsvegar komist að þeirri niðurstöðu að börnum svart/hvítra hjóna sé ekki vel tekið í þjóðfélaginu.

-Ég gef ekki saman svart og hvítt fólk vegna þess að ég vil ekki að börn lendi í aðstöðu sem þau hafa ekkert haft með að gera. Í hjarta mínu finnst mér að börnin muni líða fyrir það.

Viðkomandi par ætlar að leita til dómsmálaráðuneytisins vegna þessa.