Pattstaða í Alþingisgarðinum

Fólki hefur fjölgað á ný fyrir aftan Alþingishúsið og er lögregla að reyna að tæma garðinn. Um tíu manns sem hafa verið handteknir eru í einu horni garðsins og virðist sem lögregla sé að reyna að tæma garðinn til þess að koma þeim handteknu á brott. Að sögn fréttamanns sem er á staðnum er allt á suðupunkti í garðinum og hefur piparúða verið beitt nokkrum sinnum.

Lögreglumenn lýsa því ítrekað yfir að um sé að ræða ólögleg mótmæli og er fólkið beðið um að koma sér á brott úr garðinum.

Fólkið hefur nú tekið til þess bragðs að setjast niður til þess að gera lögreglunni erfiðara fyrir að tæma garðinn.