Óli Stefán: Væri ekki verra að setja hann hjá Alberti

Leikur Grindavíkur og ÍBV, eða Svínaflensuleikurinn eins og menn eru farnir að kalla hann, fer fram á Grindavíkurvelli klukkan 18.00 í kvöld.

Leiknum var frestað á sínum tíma þegar lunginn af Grindavíkurliðinu lagðist í bælið með svínaflensu og nú er loksins komið að því að spila leikinn.

Nokkuð er undir hjá báðum liðum en það lið sem sigrar er öruggt með sæti sitt í deildinni næsta sumar.

„Ég er að fá mér kaffi hjá Orra Hjaltalín. Það er kannski ekki mælt með því að drekka mikið kaffi fyrir leiki en ég er svakalegur kaffisvelgur og ræð ekki við mig," sagði Óli Stefán léttur við Vísi.

„Það er annars stemning í mannskapnum. Við höfum vissulega verið að spila þétt upp á síðkastið en nennum ekkert að nota það sem afsökun og mætum grimmir í kvöld," sagði Óli en Grindavík hefur tapað tveim leikjum í röð eftir að hafa skellt FH í Krikanum.

„Ég veit ekki alveg hvað gerðist. Það var kannski blanda af ofmati og svo álagi. Við spiluðum vel í 70 mínútur gegn Fram en svo hrundi allt og þrjú mörk hjá þeim. Gegn Fylki vorum við síðan bara lélegir."

Óli Stefán segir alltaf gaman að spila gegn ÍBV og hann bíður sérstaklega eftir því að mæta sínum gamla félaga úr Grindavíkurliðinu, markverðinum Alberti Sævarssyni.

„Það verður gaman að mæta kallinum. Ekki værri verra að skora sitt fyrsta mark í svona 2 ár gegn honum. Við vonum það besta," sagði Óli léttur og fékk sér enn einn kaffisopann í dag.