Sviku sig inn í Vítisenglana

Vélhjólaklúbburinn Fáfnir hefur verið lagður niður og hefur hlotið formlega stöðu sem stuðningsklúbbur Vítisengla. Hann hefur nú tekið upp nafn Vítisenglanna, eða Hells Angels.

Samkvæmt heimildum Fréttablaðsins innan úr lögreglunni er talið að tugmilljónasvik nokkurra ungra manna út úr Íbúðalánasjóði og tveimur hlutafélögum fyrr í sumar hafi verið lokaprófið sem samtökin alþjóðlegu lögðu fyrir Fáfnisliða áður en þeim var veitt aðild.

Fjórir menn um tvítugt, sem allir tengjast Fáfni, sátu um skeið í gæsluvarðhaldi vegna svikanna, sem voru afar flókin. Fimmti maðurinn var síðan handtekinn á dögunum, grunaður um að hafa stýrt fjórmenningunum. Sá er eldri bróðir eins þeirra og einnig tengdur Fáfni.

Það er alþekkt að Vítisenglar láti umsækjendur sanna sig með því að fremja afbrot af þessu tagi. Féð sem svikið var út nam ríflega fimmtíu milljónum króna og er ófundið. Ljóst þykir að ungu mennirnir hafi frá upphafi átt von á því að þurfa að sitja inni fyrir glæpinn.

Fáfnisliðar sóttu nýverið fund Vítisengla í Englandi og sneru aftur þaðan sem aðilar að samtökunum. Í tilkynningu frá Ríkislögreglustjóra er fullyrt að Fáfnir muni að óbreyttu geta sótt um fulla aðild að Vítisenglunum á seinni hluta næsta árs.

Haraldur Johannessen ríkislögreglustjóri segir lögreglu líta málið alvarlegum augum í ljósi þess að fyrir liggur að Vítisenglar eru skilgreindir sem skipulögð glæpasamtök. Full ástæða sé til að huga að breytingum á lögum í þá veru að öll starfsemi slíkra samtaka verði gerð ólögleg.

Stýrihópur um skipulagða glæpastarfsemi, sem starfað hefur frá árinu 2004, kom saman í gær vegna fréttanna af Fáfni. Í kjölfarið fundaði formaður hópsins með embættismönnum úr dómsmálaráðuneytinu um möguleikann á því að setja slík lög.

„Hells Angels snúast fyrst og fremst um afbrot og gróða af ólöglegri starfsemi og hafa valdið mikilli óáran og skelfingu í Danmörku og víðar á Norðurlöndunum," segir Haraldur.

„Skilaboðin eru mjög skýr frá lögreglunni í landinu: hún mun gera allt sem hún getur, í samstarfi við toll og aðra aðila hérlendis og erlendis, til þess að reyna að koma í veg fyrir það að skipulögð glæpastarfsemi nái fótfestu í íslensku samfélagi og fái að blómstra þar óáreitt."

- sh