Innbrotafaraldur herjar á íbúa Suðurnesja

Innbrotafaraldur hefur herjað á íbúa á suðurnesjum nú í mánuð en á annan tug innbrota hafa verið tilkynnt til lögreglunnar á suðurnesjum. Að sögn Skúla Jónssonar, aðstoðaryfirlögregluþjóns, þá hófst faraldurinn í lok september og náði hámarki fyrir stuttu. Hann segir faraldurinn þó í rénum nú.

„Þetta hófst í lok september en þá var farið með dags milllbili inn á veitingastað við Garðskagavita tvívegis," segir Skúli en þjófarnir tóku flatskjái og skjávarpa. Sex einstaklingar hafa verið yfirheyrðir vegna innbrotanna en meðal þess sem lögreglan styðst við í rannsókn málsins er lífsýni sem fundust á vettvangi.

Stuttu síðar var svo farið tvívegis inn í lausakennslustofur, stundum nefndar kálfar, en þar var stolið tveimur skjávörpum. Þá hafa fimm innbrot í íbúðarhúsnæði verið tilkynnt til lögreglunnar en öll innbrotin voru í Reykjanesbæ. Þjófarnir tóku þá margvísislega muni. Að sögn Skúla er oftast um tölvur, flatskjái og önnur raftæki að ræða.

Einnig hafa þjófarnir herjað á bíla og aftur eru þjófarnir að taka flatskjái og tölvur. Um daginn var svo brotist inn í íþróttahúsið í Njarðvík en þar var kveiktur eldur og svo var eldur borinn að bifreið fyrir utan.

„Síðan var tilkynnt um innbrot í sumarbústaði sem er verið að smíða. Þar hafa þjófarnir verið að taka verkfæri," segir Skúli en nokkuð hefur dregið úr innbrotum undanfarna daga.

Hann segir lögregluna hafa sent út tilkynningar til fólks um að gæta þess að ganga almennilega frá húsum sínum þegar það fer að heiman. Kveikja á þjófavörnum hafi þau slíka á heimilunum. Einnig bendir hann fólki á að fela verðmæti sem það skilur eftir í bílum.

„Svo virðist alltaf verið markaður fyrir þýfið. Ég held að þetta sé frekar spurning um eftirspurn heldur en framboð," segir Skúli sem er undrandi á því hversu auðvelt það virðist vera fyrir þjófa að koma þýfi í verð. Hann bendir á að það er refsivert að kaupa þýfi.

Svo hefur einnig borið á skemmdarverkum í Vogum. Síðast var sykri hellt í bensíntank jeppabifreiðar. Eigandi bifreiðarinnar var varaður við að kveikja á bílnum þar sem athugull vegfarandi sá sykur á jörðinni við bensíntankinn. Hefði bifreiðin verið gangsett þá hefði sykurinn geta stórskemmt bílinn. Skemmdarvarganna er leitað að sögn Skúla en yfirheyrslur í því máli fara fram í dag og á morgun.

Aðspurður hvort innbrotum hafi fjölgað mikið á undanförnum mánuðum á suðurnesjum segir hann til samanburðar að í ágúst hafi fimm minniháttar þjófnaðir verið kærðir til lögreglunnar. Því er um heilmikla aukningu að ræða.