Endurskipulagning framhaldsskólanna komin vel á veg

Tveir framhaldsskólar bjóða upp á þriggja ára nám til stúdentsprófs. Um tilraunaverkefni er að ræða og segir menntamálaráðherra, Katrín Jakobsdóttir, að verði reynslan úr því góð gæti þetta leitt til endurskipulagningar á framhaldsskólakerfinu. Skólarnir sjálfir hafi þó sjálfdæmi um hvort þeir taki kerfið upp, reynist það vel.

Skólarnir sem um ræðir eru Framhaldsskólinn í Mosfellsbæ og Kvennaskólinn í Reykjavík. Þeir hafa fengið styrk frá menntamálaráðuneytinu til þessa þróunarverkefnis.

Ingibjörg S. Guðmundsdóttir, skólameistari Kvennaskólans, segir að innan skólans hafi nám til stúdentsprófs verið skilgreint sem 200 eininga nám. Er þar vísað til nýrra framhaldsskólaeininga, en samkvæmt skilgreiningu í lögum býr þriggja vikna vinna að baki hverri einingu. Samkvæmt lögunum á stúdentspróf að vera 180 til 240 slíkar einingar.

Ingibjörg segir að miðað sé við að nemendur taki 60 einingar á ári. Duglegir nemendur geti bætt við einingum og klárað skólann á þremur árum. Þeir sem vilji fara hægar í sakirnar geri það; útskrifist á þremur og hálfu eða fjórum árum.

Katrín Jakobsdóttir segir að skólarnir hafi sjálfdæmi um hve margar einingar þeir kenni innan ramma laganna. Hún telur að verði reynslan af þróunarverkefninu góð muni það nýtast fleiri skólum og jafnvel framhaldsskólakerfinu öllu. Skólanna sjálfra sé síðan að ákveða hvort þeir bjóði upp á fleiri einingar og hvernig þeir vilji þróast. Áður hafi verið rætt um 180 einingar þegar þriggja ára stúdentspróf var skoðað. Nú sé um fleiri einingar að ræða.

Gert er ráð fyrir því að hluti þess náms sem nú er kenndur í framhaldsskólum færist niður í grunnskólana.

Katrín segir skólana tvo hafa sýnt frumkvæði að því að taka þátt í þessu þróunarverkefni. Reiknað er með að það standi í þrjú til fjögur ár og síðan verði reynslan af því metin.- kóp