Framsókn styður líklega Seðlabankafrumvarp

Siv Friðleifsdóttir, þingflokksformaður Framsóknarflokksins, telur líklegt að framsóknarmenn muni styðja frumvarp ríkisstjórnarinnar um skipulagsbreytingar í Seðlabankanum miðað við það sem komið hefur fram í fjölmiðlum um innihald þess. Hún bendir á að framsóknarmenn hafi áður lagt fram svipað frumvarp. Siv segir að ekki sé um pólitískar ofsóknir að ræða.

Í bréfi sem Jóhanna Sigurðardóttir, forsætisráðherra, sendi bankastjórum Seðlabankans í gær er farið fram á að þeir biðjist lausnar frá embætti. Samkvæmt Fréttablaðinu í dag hefur Jóhanna óskað eftir svari fyrir næstkomandi fimmtudag.

„Þannig að þegar frumvarpið kemur munum við að sjálfsögðu skoða það en ég á von á frekar jákvæðum tóni okkar framsóknarmanna í þessu máli," sagði Siv í samtali við fréttastofu.

Ekki pólitískar ofsóknir á hendur Davíð

Aðspurði hvort um nauðsynlegar breytingar eða pólitískar ofsóknir á hendur Davíð Oddssyni sé að ræða svaraði Siv: „Ég held að það sé nauðsynlegt að gera breytingar á Seðlabankanum. Þannig að þegar frumvarpið lítur dagsins ljós þá munum við fara yfir það og mér heyrist að það sé í anda þess máls sem Höskuldur Þórhallsson og fleiri í Framsóknarflokknum höfum nú þegar lagt fram í þingið."

Ekki sé um pólitískar ofsóknir að ræða, að mati Sivjar. „Nei ég tek ekki undir orð Halldórs Blöndals um það. Ég hef heyrt að hann hafi tekið þannig til máls á opinberum vettvangi og ég tek ekki undir það."

Einn faglega ráðinn bankastjóri

Ríkisstjórnin hefur áður lýst því yfir að hún vilji fara í skipulagsbreytingar í Seðlabankanum. Ráða á einn bankastjóra í stað þeirra þriggja sem nú eru starfandi. Gerðar verða faglegar kröfur til að koma í veg fyrir pólitískar ráðningar.

Forsætisráðherra lagði frumvarpið fyrir ríkisstjórnina í morgun en það verður síðan kynnt þingflokkum Framsóknar, Vinstri grænna og Samfylkingar í dag. Gert er ráð fyrir því að frumvarpið verði lagt fram á Alþingi á morgun.

Fréttastofa hefur ítrekað reynt að ná í bankastjóra Seðlabankans undanfarna daga án árangurs.