Ingólfur: Ætlaði ekki að trúa þessu

Hinn sextán ára Ingólfur Sigurðsson var hæstánægður með að hafa skorað í sínum fyrsta leik með meistaraflokki KR. Hann innsiglaði 3-0 sigur KR á ÍBV í kvöld með marki aðeins fimm mínútum eftir að hann kom inn á sem varamaður.

„Þetta var frábært og í raun ólýsanlegt," sagði Ingólfur eftir leikinn. „Ég ætlaði ekki að trúa þessu að ég skoraði. Ég hef beðið eftir tækifærinu svo lengi og svo loksins kom það. Það var frábært að leikurinn endaði með þessum hætti."

„Ég hef vissulega þurft að vera þolinmóður í sumar. En það er þess virði. Ég hef verið að spila með öðrum flokki KR í sumar sem hefur verið frábært. Ég er mjög ánægður í KR og sé alls ekki eftir því að hafa komið til félagsins. Þetta er án vafa ein sú besta ákvörðun sem ég hef tekið."

Hann segir óvíst hvað framtíðin ber í skauti sér en hann hefur verið sagður eftirsóttur af mörgum félögum víða um Evrópu.

„Hér vil ég vera og hér ætla ég að reyna að nýta þau tækifæri sem ég fæ. Það er eitthvað um það að önnur lið hafa verið að sýna áhuga en ég er samt mest rólegur. Ég tók þá ákvörðun að vera hér heima í sumar og klára tímabilið. Það kemur svo í ljós hvað verður."

Hann sagði að sigur sinna manna í KR á ÍBV í kvöld hafi verið sanngjarn. „Já, við erum með miklu betra lið en þeir og það sýndum við í kvöld. Ég er virkilega ánægður með sigurinn og vonandi höldum við áfram á sömu braut."