Bendtner ætlar að verða einn besti framherji heims

Daninn Nicklas Bendtner, leikmaður Arsenal, fer ekkert í grafgötur með þann metnað sinn að verða einn besti framherji heims á næstu fimm árum.

Bendtner hefur sett sér það takmark að verða markahæsti leikmaður úrvalsdeildarinnar á næstu árum sem og á HM. Hann segist vilja verða heimsþekktur fyrir markaskorun sína.

„Ég hafði þrjú markmið fyrir þetta ár. Að komast í Arsenal-liðið, komast á HM og verða leikmaður ársins í Danmörku. Ég náði þessu öllu," sagði Bendtner.

„Ég ætla mér einnig að verða markakóngur ensku úrvalsdeildarinnar, markakóngur á HM og innan fimm ára ætla ég mér að vera einn besti framherji heims."