Ábending Ríkisendurskoðunar hunsuð

Ríkisendurskoðun telur að ríkisstjórnin hefði þurft að afla sér lagaheimildar fyrir því að semja við kröfuhafa um yfirtöku þeirra á Arion banka og Íslandsbanka. Slíka heimild skorti.

Ríkisendurskoðun vildi að úr þessu yrði bætt í fjáraukalögum, sem voru afgreidd í fyrrakvöld án þess að tekið væri tillit til þessara ábendinga Ríkisendurskoðunar.

Að sögn Guðbjarts Hannessonar, formanns fjárlaganefndar, er ágreiningur um málið milli Ríkis­endurskoðunar og fjármálaráðuneytisins. Ráðuneytið telur að ríkið geti ráðstafað bönkunum til kröfuhafa án sérstakrar heimildar.

Guðbjartur segir að athugasemd Ríkisendurskoðunar hafi borist rétt áður en lokaatkvæðagreiðsla um fjáraukalög var að hefjast á Alþingi. Hann hafi ekki talið ástæðu til að fresta atkvæðagreiðslunni. Sest verði yfir málið fljótlega til að meta hvernig hægt er að bregðast við svo að yfirfærsla bankanna til kröfuhafa standist lögformlegar kröfur. Hugsanlega megi afla sérstaks samþykkis Alþingis fyrir áramót.

Sveinn Arason ríkisendurskoðandi sagði við Fréttablaðið að þar sem þingið veitti á sínum tíma lagaheimild fyrir því að ríkið yfirtæki bankana og fjármagnaði endurreisn þeirra þyrfti nýja lagaheimild til þess að færa bankana frá ríkinu og yfir til kröfuhafa. Hann segist telja að þessar athugasemdir hafi komist tímanlega til Alþingis þótt ekki hafi verið tekið tillit til þeirra við afgreiðslu fjáraukalaga.

Kristján Þór Júlíusson, þingmaður Sjálfstæðisflokksins, gerði athugasemdir við það á Alþingi í gær að málið hefði verið afgreitt með þessum hætti og að fjárlaganefnd hefði ekki séð ábendingar Ríkisendurskoðunar fyrr en á fundi í gærmorgun þótt þær hefðu borist þinginu fyrir atkvæðagreiðsluna.

Björn Valur Gíslason, þingmaður VG, svaraði Kristjáni Þór með því að fjármálaráðuneytið teldi að heimildin frá í fyrra hefði verið veitt til að fjármagna bankana og halda þeim á floti, en ekki til þess að ríkið keypti þá.

Kröfuhafarnir hafi ekki verið að kaupa bankana úr ríkiseigu. Þeir hafi í raun aðeins verið að leysa til sín eigur sínar.peturg@frettabladid.is