Segir klækjastjórnmálum hafa verið beitt í gær

Sigmundur Davíð Gunnlaugsson ræddi við fréttamenn eftir að hlé var gert á þingflokksfundi Framsóknarmanna í þinghúsinu fyrir stundu. Þar sagði hann lítið standa útaf borðinu en hann var á leið á fund með Steingrími J. Sigfússyni. Sá fundur stóð þó stutt yfir en þeir tveir fóru síðan yfir í félagsmálaráðuneytið að hitta Jóhönnu Sigurðardóttur. Þeir bjuggust við að sá fundur stæði einnig stutt yfir þar sem aðeins þyrfti að ræða nokkrar útfærslur á efnahagsmálunum. Sigmundur sagði að klækjastjórnmálum hefði verið beitt í gær.

Sigmundur sagðist þó sannfærður um að það hefði ekki verið á vegum Jóhönnu Sigurðardóttur né Steingríms J. Sigfússonar þegar kynna átti opinberlega tillögur sem Framsóknarflokkurinn var rétt búinn að kíkja á. Hann sagði aðra hafa farið fram úr sér og átti þar væntanlega við Skúla Helgason framkvæmdarstjóra Samfylkingarinnar.

Að loknum fundinum með oddvitum verðandi ríkisstjórnar reiknaði Sigmundur með að funda aftur með Framsóknarmönnum þar sem málin yrðu kláruð.

Hann sagði að í dag ætti að vera hægt að klára öll mál á milli flokkanna og því gæti Samfylkingin haldið sinn flokksstjórnarfund í dag. Eftir það væru málin í höndum forseta Íslands.