Pólverjar enn langfjölmennastir

Þann 1. janúar 2009 voru skráðir hérlendis 24.379 erlendir ríkisborgarar. Á heimasíðu Hagstofunnar segir að það samsvari fjölgun um 958 manns frá sama tíma í fyrra. Hlutfall erlendra ríkisborgara af heildarmannfjölda var 7,6% í ársbyrjun 2009 samanborið við 7,4% ári áður.

„Fjölmennastir erlendra ríkisborgara hér á landi voru Pólverjar (11.003), Litáar (1.670), Þjóðverjar (1.140) og Danir (951) líkt og verið hefur undanfarin ár," segir Hagstofan.

Þá segir að fram til ársins 2003 hafi konur jafnan verið fjölmennari en karlar í hópi erlendra ríkisborgara. „Á tímabilinu 2004-2008 snerist sú þróun við og erlendir karlar urðu mun fleiri en konur. Í ársbyrjun 2009 bar hins vegar svo við að erlendum körlum fækkaði frá árinu áður um 308. Erlendum konum fjölgaði aftur á móti um 1.266 frá fyrra ári," segir ennfremur.

Hagstofan bendir einnig á að þessum tölum beri að taka með þeim fyrirvara að það getur dregist að útlendingar sem fá dvalarleyfi séu skráðir í íbúaskrá og á sama hátt geti orðið töf á því að einstaklingar sem flytjast af landi brott séu felldir af íbúaskrá.

Á heimasíðu Hagstofunnar má kynna sér málið nánar.