Guðmundur Reynir: Góður karakter í liðinu

Guðmundur Reynir Gunnarsson var ánægður með sigur sinna manna í KR á ÍBV í kvöld. Lokatölur voru 3-0, KR í vil.

„Þetta byrjaði frekar illa hjá okkur en við vorum nokkuð frá okkar besta í fyrri hálfleik. Þeir hefðu vel getað verið búnir að skora áður en fyrsta markið hjá okkur kom en sem betur fer kom ekki til þess."

„Það er mikill og góður karakter í þessu liði. Við höfum sýnt að við getum náð að vinna okkur upp eftir slæma byrjun eins og við sýndum bæði í kvöld og gegn Keflavík um helgina."

Hann segir KR vissulega stefna enn á fyrsta sæti deildarinnar. „Við gerum það að sjálfsögðu á meðan sá möguleiki er fyrir hendi. Annars stefnum við á að halda sætinu," bætti hann við.

Þegar fjórir leikir eru eftir hefur FH sjö stiga forystu á KR sem er með 36 stig. Fylkir er svo í þriðja sæti deildarinnar með 33.