Áfrýjunarnefnd staðfestir 315 milljón króna sekt Haga

Áfrýjunarnefnd samkeppnismála hefur staðfest úrskurð Samkeppniseftirlitsins frá því 19. desember 2008 um 315 milljón króna stjórnvaldssekt Haga vegna alvarlegra brota á samkeppnislögum.

Samkeppniseftirlitið komst að þeirri niðurstöðu að Hagar, sem meðal annars rekur verslanirnar Bónus, Hagkaup og 10-11, hafi misnotað markaðsráðandi stöðu sína með aðgerðum sem beindust gegn keppinautum félagsins á matvörumarkaði. Samkeppniseftirlitið taldi að brot Haga hafi verið alvarleg og til þess fallin að valda atvinnulífinu og almenningi miklu samkeppnislegu tjóni.

Brotin áttu sér stað í verðstríði Bónuss við aðrar lágvöruversalnir

Brotin áttu sér stað í verðstríði Bónuss við aðrar lágvöruversalanir þegar mjólk og mjólkurvörur voru seldar undir kostnaðarverði. Tap Haga af verðstríðinu var um 700 milljónir krónur.

Ákvörðun skotið til áfrýjunarnefndar



Hagar skutu ákvörðun Samkeppniseftirlitsins til áfrýjunarnefndar samkeppnismála og kröfðust þess að hún yrði felld úr gildi eða sektir stórlega lækkaðar. Gerðu Hagar í kæru sinni margvíslegar athugasemdir við rannsókn Samkeppniseftirlitsins og efnislega niðurstöðu.

Rannsóknin hófst 2006

Rannsókn málsins hófst um mitt ár 2006 eftir að Samkeppniseftirlitið hafði aflað sjónarmiða og því borist ábendingar um hugsanleg brot Haga.

Ákvörðun Samkeppniseftirlitsins

Áfrýjunarnefnd samkeppnismála staðfestir ákvörðun Samkeppniseftirlitsins og telur nefndin að rannsókn málsins hafi verið eðlileg og fellst á að Hagar hafi verið í markaðsráðandi stöðu. Tekur áfrýjunarnefndin fram að brot Haga hafi staðið í langan tíma og verið stórfellt. Fellst nefndin á að 315 milljón króna stjórnvaldssekt hafi verið hæfileg viðurlög í málinu.