Forstjórinn segir þörf á hörðum aðgerðum

Reynt verður eftir fremsta megni að komast hjá uppsögnum á Landspítalanum þótt mikill niðurskurðir blasi við. Þetta segir Hulda Gunnlaugsdóttir, forstjóri Landspítalans, sem mun funda með starfsfólki spítalans í dag. Þó sé líklegt að starfshlutfall verði skert eða vöktum breytt.

„Þetta verður erfitt, verður stór biti, en við reynum að komast hjá uppsögnum. Við erum með ákveðnar hugmyndir sem ég ætla að ræða við starfsfólkið," segir Hulda.

Mikill niðurskurður blasir við í heilbrigðiskerfinu á næstu árum. Í ár er boðaður niðurskurður um sjö til tíu prósent eða 2,8 milljarðar. Búið var að skera niður um 70 prósent af þeim kostnaði, að sögn Huldu, en vegna gengisáhrifa nemur niðurskurðurinn nú einungis um fjörutíu prósentum.

„Í fyrra fengum við aukafjárveitingu sem dekkaði að stórum hluta gengisáhrifin en nú fáum við ekki neitt þar sem ríkiskassinn er tómur," segir Hulda. „Til að mæta þessum kröfum þurfum við að fara í harðari aðgerðir."

„Ég sagði í byrjun árs að við myndum ekki lækka þjónustustigið eða minnka gæðin, ekki fækka rannsóknum og ekki minnka kennslu. Við höfum staðið við það. Það er mikill sigur fyrir starfsfólk Landspítalans sem hefur staðið sig gríðarlega vel í þessum breytingum. En þar sem gengið er svo óhagstætt þá er sá frábæri árangur bara ekki nægur. Við þurfum að gera meira," segir forstjórinn.

„Ef við náum ekki að gera allt sem við ætlum okkur á þessu ári verðum við að taka verkefnin með okkur yfir á næsta ár. Halli spítalans hverfur ekki og við vitum ekki hvert gengi krónunnar verður á næsta ári. Verkefnið verður bara stærra og stærra."- kh