Leikskólakennarar kynna störf sín fyrir framhaldsskólanemum

Þau Halldóra Guðmundsdóttir, deildarstjóri í leikskólanum Dvergasteini og Ásmundur K. Örnólfsson, aðstoðarleikskólastjóri í Ægisborg, kynntu starf leikskólakennara fyrir nemendum Fjölbrautaskólans við Ármúla á fimmtudaginn í síðustu viku. Leikskólakennarar kynna starf sitt fyrir framhaldsskólanemum víða í Reykjavík þessa dagana. Heimsækja þeir kennslustundir í uppeldisfræði og segja nemendum frá öllu því sem þeir vilja vita um starf leikskólakennara.

Halldóra byrjaði á að segja frá launakjörum leikskólakennara og starfstíma. Hún sagði líka frá því hvernig námið er og að nú er verið að breyta því úr þriggja ára háskólanámi yfir í fimm ára nám. Ásmundur sagði frá starfi sínu í 18 ár sem leikskólakennari og hversu skemmtilegt starfið er. Sagðist Ásmundur telja að margir kynbræður sýnir færust á mis við mikið með því að skoða ekki möguleika á að starfa á þessum vettvangi. Hann sagði leikskólakennarastarfið krefjandi starf og erfitt en jafnframt mjög fjölbreytt og gefandi. Nefndi hann sem dæmi að starfið byði upp á vinnu bæði úti og inni og þátttöku í mikilli hreyfingu og skemmtilegum leikjum.

Nemendur spurðu þau Hallóru og Ásmund út í ýmislegt tengt starfinu, hvort ekki myndi fækka þeim sem veldu þennan starfsvettvang ef verið væri að lengja starfið. Þau svöruðu því til að lenging námsins væri eðlileg þróun og gerð í þeim tilgangi að vera með enn betur menntað og fært fólk í stéttinni og við værum að gera það sama og nágrannalöndin á þessu sviði. Halldóra sagðist jafnframt búast við að hækkað menntunarstig myndi væntanlega leiða til hærri launa leikskólakennara í framtíðinni. Gert er ráð fyrir að starf leikskólakennara verði kynnt víðar í framhaldsskólum á þessri önn, eftir því sem fram kemur í tilkynningu frá borginni.