Seðlabankinn lánaði Straumi

Fjármálaeftirlitið beitti neyðarlögunum á Straum Burðarás til að bjarga tugmilljarða innistæðum sem íbúðalánsjóður og lífeyrissjóðirnir áttu í bankanum. Viðskiptaráðherra útilokar ekki að eitthvað kunni að falla á ríkissjóðs vegna yfirtökunnar. Seðlabankinn lánaði Straumi 19 milljarða í desember.

Bankinn átti að greiða lán upp á 33 milljónir Evra í dag eða sem nemur tæpum fimm milljörðum króna. Lausafé bankans nam hins vegar aðeins 15 milljónum Evra. Bankinn reyndi að fá eigendur til að leggja meira fé í reksturinn en því var synjað. Því var ljóst að bankinn stefni í greiðslustöðvun.

Breska fjármálaeftirlitinu var kunnugt um stöðu bankans í lok síðustu viku og gerði því íslenska viðvart. Bretar ætluðu að loka útibúi bankans í Bretlandi í morgun en íslensk fjármálaeftirlitið ákvað hins vegar að beita neyðarlögunum og taka reksturinn yfir.

,,Breska fjármálaeftirlið hefði tekið dótturfélagið í Bretlandi en þetta var íslenskur banki þannig að hann kom í fangið á íslenskum stjórnvöldum hvort sem þeim líkaði það betur eða verr," segir ..

Heildarinnlán bankans námu tæpum 70 milljörðum króna og voru íslenskir lífeyrissjóðir og íbúðalánasjóður meðal stærstu innistæðueigenda. Að mati fjármálaeftirlitsins var nauðsynlegt að beita neyðarlögunum til að tryggja þessar innistæður.

,,Ef bankinn hefði farið í venjulega greiðslustöðvun hefði ekki verið hægt að tryggja þessar innistæður með sambærilegum hætti," segir Gunnar Harldsson, stjórnarformaður Fjármálaeftirlitsins.

Straumur Burðarás var að stærstum hluta í eigu Björgólfs Thor Björgólfssonar sem einnig var stjórnarformaður bankans. Meðal eigenda voru einnig fimm lífeyrissjóðir með eignarhlut upp á tæpan einn og hálfan milljarð.

,,Það er allt útlit fyrir að hlutaféð sé orðið enskis virði," segir Gylfi Magnússon viðskiptaráðherra.

Seðlabankinn veitti bankanum lán upp á 133 milljónir evra eða tæpa 19 milljarða króna miðað við núverandi gengi í desember á síðasta ári.

,,Já Seðlbankinn veitti lán en það lán var veitt gegn veði og ég hef ekki ástæðu til að ætla annað en að það veð sé í lagi þannig að Seðlbankinn á ekki að þurfa tapa á því," segir Gylfi.

Ráðherra útilokar ekki að eitthvað kunni að falla á ríkissjóðs vegna málsins. ,,Það er ekki þannig að það séu einhverjar stórar ábyrgðir að falla á ríkið. Ríkið bar ekki ábyrgð á þessum banka nema að mjög óverulegu leyti sem eru þessar innistæður en bankinn var aðallega fjármágnaður á annan hátt þannig að það er ekkert útlit fyrir að þetta verði þungt högg fyrir ríkið þótt við hefðum gjarnan viljað sjá þennan banka bjarga sér sjálfur en það tókst því miður ekki."