Fjögurra ára fangelsisdómur Annþórs staðfestur í Hæstarétti

Hæstiréttur staðfesti í dag fjögurra ára fangelsisdóm Héraðsdóms Reykjavíkur yfir Annþóri Kristjáni Karlssyni og tveggja og hálfs árs fangelsisdóm yfir Tómasi Kristjánssyni. Þeir voru dæmdir fyrir stórfellt fíkniefnalagabrot með því að hafa staðið saman, ásamt tveimur öðurm, að innflutningi á rúmu fjögurra og hálfu kílói af amfetamíni og rúmu hálfu kílói af kókaíni frá Þýskalandi til Íslands.

Efnin voru ætluð til söludreifingar í ágóðaskyni, en fíkniefnin, sem voru flutt til landsins með hraðsendingarfyrirtækinu UPS, fundust við leit tollgæslu og lögreglu.

Var Annþóri gefið að sök að hafa lagt á ráðin um innflutninginn, látið senda fíkniefnin frá Þýskalandi til Íslands og hafa ætlað að móttaka eða láta móttaka þau. Tómasi var gefið að sök að hafa lagt á ráðin um innflutninginn og notað sér aðstöðu sína sem starfsmaður hraðsendingarfyrirtækisins á Keflavíkurflugvelli til að miðla upplýsingum um hvernig haga skyldi sendingu og móttöku fíkniefnanna þannig að þau kæmust til móttakanda efnanna hér á landi án afskipta yfirvalda.

Þeir neituðu báðir sök í málinu. Framburðir þeirra þóttu ekki verða lagðir til grundvallar niðurstöðunni, enda ekkert í málinu sem studdi þá. Talið var sannað með framburðum tveggja meðákærðu, sem voru efnislega á sama veg um flesta þætti málsins og nutu stuðnings af gögnum málsins, að Annþór og Tómas hefðu gerst sekir um þá háttsemi sem þeir voru ákærðir fyrir.

Voru þeir einnig dæmdir til þess að greiða málsvarnarlauns verjenda sinna, tæpar 400 þúsund krónur.