Andri: Englendingarnir hafa gjörbreytt liðinu hjá okkur

Fyrirliðinn Andri Ólafsson hjá ÍBV átti góðan leik þegar Eyjamenn unnu 1-0 sigur gegn Þrótturum á Hásteinsvelli í kvöld og var að vonum ánægður með að innbyrða stigin þrjú við erfiðar veðurfarslegar aðstæður.

„Þetta var mjög góður leikur hjá okkur og við vorum að höndla vindinn vel. Við náðum að spila boltanum ágætlega á milli og vorum að ógna þó svo að við værum á móti vindi í seinni hálfleik þá vorum við alls ekki verri aðilinn," sagði Andri sem hrósaði sérstaklega ungum leikmönnum ÍBV fyrir góða spilamennsku upp á síðkastið.

„Ungu strákarnir hafa verið frábærir. Englendingarnir Ajay og Chris [Clements] hafa bara gjörbreytt liðinu hjá okkur. Þórarinn er búinn að leysa stöðuna hjá Matt Garner ótrúlega vel eftir að Matt meiddist, enginn munur að vera með Matt eða Þórarinn.

Svo er Eiður auðvitað búinn að brillera algjörlega, kom nokkuð óvænt í liðið og hefur verið að standa sig alveg ótrúlega vel í sumar og fáránlegt að hann skuli ekki vera valinn í undir 21-árs landslið Íslands," segir Andri.