Grindvíkingar sækja um frestun á leiknum gegn Fram

Grindvíkingar ætla að sækja um enn eina frestunina í Pepsí deild karla vegna veikinda í liðinu.

Leikmenn Grindavíkur eiga enn talsvert í land með að ná sér eftir flensuna sem herjaði á liðið í síðustu viku. Vel á annan tug leikmanna veikist, fimm þeirra greindust með svínaflensu og hefur þurft að fresta tveimur leikjum liðsins.

Þorsteinn Gunnarsson formaður knattpsyrnudeildar sagði við fréttastofu í morgun að ástand leikmannanna á æfingu í gær hafi verið það slæmt að ákveðið hafi verið að sækja um aðra frestun á leiknum gegn Fram sem fyrirhugaður er á fimmtudag en leiknum hafði þegar verið frestað um sólarhring vegna flensunnar.

Þorsteinn segir að læknir muni líta á leikmennina og formleg beiðni um frestun verði lögð inn til KSÍ í dag.