Hýddar fyrir að vera í brjóstahöldurum

Islamistar í Sómalíu hafa lagt blátt bann við því að konur þar klæðist brjóstahöldurum. Konur sem klæðast slíkri flík eru dæmdar til opinberrar hýðingar.

Rússneski fréttavefurinn mignews.ru hefur eftir sjónarvottum í höfuðborginni Mogadishu að vopnaðir skæurliðar stöðvi konur á götum úti og kanni hvort þær klæðist hinni forboðnu flík.

Ef svo reynist vera eru þær handteknar og pískaðar opinberlega. Brjóstahaldararnir eru brenndir á báli.

Rússneski vefurinn segir að Al-Shabaab samtök harðlínu múslima ætli sér að koma á ströngustu Sharia lögum sem nokkursstaðar séu í gildi.

Vefurinn segir að fyrr í þessum mánuði hafi tveir þjófar verið gripnir við iðju sína. Refsing þeirra hafi verið að höggva af þeim bæði hendur og fætur.

Karlmenn mega einnig þola refsingar ef þeir fara ekki eftir siðferðisstöðlum Al-Shabaab. Karlmönnum er gert að vera með sítt skegg. Ef þeir ekki hlýða eru einnig þeir dregnir undir pískinn.