Guðrún Sóley meidd - Silvía Rán valin í hennar stað

Sigurður Ragnar Eyjólfsson, landsliðsþjálfari kvenna, hefur þurft að gera aðra breytingu á landsliðshópi sínum fyrir leikinn gegn Eistum í undankeppni HM 2011.

Guðrún Sóley Gunnarsdóttir hefur bæst á meiðslalista með Dóru Stefánsdóttur og hefur Silvía Rán Sigurðardóttir úr Þór/KA verið kölluð inn í hópinn í hennar stað.

Silvía Rán er nýliði í hópnum fyrir leikinn á fimmtudag og heldur svo út til Portúgal á föstudagsmorgun þar sem hún mun leika með U-19 ára landsliðinu í undankeppni EM.