Réttað í Barðastrandarráni

Aðalmeðferð hófst í svokölluðu Barðastrandarmáli nú í morgun en þá fóru tveir ungir menn inn á heimili fullorðins úrsmiðs á Seltjarnarnesi, bundu hann og rændu sjaldgæfum og verðmætum vasaúrum.

Barðastrandarmálið er annað að tveimur málum sem komu upp með skömmu millibili fyrr á þessu ári sem áttu það sameiginlegt að brotist var inn á heimili og ráðist á húsráðendur og þeir rændir. Bæði málin vöktu athygli og óhug þegar þeir komu upp enda nánast án fordæma hér á landi. Annað ránið var framið á Arnarnesi en dæmt var í því í júlí. Höfuðpaurarnir fengu tveggja og tveggja og hálfs árs fangelsisdóm.

Hitt ránið var framið við Barðaströnd á Seltjarnarnesi í júní en aðalmeðferð í því máli hófst í dag. Fjórir menn eru ákærðir. Tveir fyrir að fara inn á heimili úrsmiðs, einn fyrir að aka ræningjunum og einn fyrir að skipuleggja ránið. Sá heitir Axel Karl Gíslason en hann á að baki langan brotaferil, meðal annars fyrir frelsissviptingu og mannrán, en hann neitar sök. Hinir þrír hafa að mestu viðurkennt sinn þátt í málinu.

Úrsmiðurinn á Barðaströnd kom fyrir rétt í dag og lýsti upplifun sinni af ráninu. Hann sagði frá því hvernig annar innbrotsþjófurinn réðst á hann og kýldi hann í andlitið. Hann var þvínæst bundinn á höndum og fótum og hótað að hann yrði spreyjaður með piparúða ef hann hreyfði sig.

Úrsmiðurinn er á áttræðisaldri og sagðist hafa óttast um líf sítt þar sem hann lá á gólfinu með hendur bundar fyrir aftan bak.

Á meðan fór annar þjófurinn um húsið í leit að sjaldgæfum og verðmætum úrum sem úrsmiðurinn hefur safnað í gegn um árin. Svo virðist sem þjófarnir hafi vitað af þessum verðmætum því þeir höfðu fátt annað á brott með sér. Alls tók ránið einhverjar 15 mínútur en þá höfðu þjófarnir sig á brott en skildu úrsmiðinn eftir bundinn. Hann náði á endanum að losa sig og hringja á hjálp.

Hann sagði við dómara í dag að líkamlegir áverkar hefðu jafnað sig fljótt en andlegir eftimálar vær hins vegar umfangsmeiri en hann hefur þurft að leita sér aðstoðar til að vinna sig út úr þessum atburðum.

Reynt verður að ljúka aðalmeðferðinni í dag en sakborningarnir mega búast við eitthvað í kring um tveggja ára fangelsi verði þeir sakfelldir.