Happadrýgst fyrir Alþingi að samþykkja Icesave

„Mín niðurstaða felur hvorki í sér þá skoðun að samið hafi verið af sér eða að afrek hafi verið unnið í Icesave-samningum," segir Gauti B. Eggertsson, hagfræðingur við Seðlabankann í New York, í grein í Fréttablaðinu í dag. Happadrýgst sé fyrir Alþingi að samþykkja frumvarp um ríkisábyrgð vegna Icesave.

Gauti segir að um málamiðlun hafi verið að ræða. Þetta hafi að mörgu leyti verið fyrirsjánleg niðurstaða í hörmulegu máli. Hann treystir sér ekki til að dæma um það hvort að hægt hefði verið að ná fram betri málamiðlun þar sem samningar af þessu tagi séu flóknir og auk þess hafi samningsstaða Íslendinga verið afskaplega veik.

„Á hinn bóginn sýnist mér að af tveimur herfilegum kostum sé happadrýgst fyrir Alþingi að samþykkja Icesave," segir hagfræðingurinn. Það sé lykilatriði í að endurreisa alþjóðlegt traust á Íslandi.

„Með því að fella samningin hefjum við háskaför sem ekki sér fyrir endann á. Það þarf að klára þetta ógæfumál og snúa sér að uppbyggingu Íslands."