Mótmælandi í mál vegna ólögmætrar handtöku

Mótmælandinn Haukur Hilmarsson er búinn að stefna fjármálaráðuneytinu vegna ólögmætrar handtöku en fyrirtaka verður í málinu um klukkan þrjú í dag í Héraðsdómi Reykjavíkur. Það er mannréttindalögfræðingurinn Ragnar Aðalsteinsson sem sækir málið fyrir Hauk. Hann krefst skaðabóta vegna handtökunnar sem átti sér stað í nóvember á síðasta ári.

Handtakan vakti gríðarlega athygli en Haukur hafði helgina áður klifrað upp á Alþingi þar sem hann flaggaði Bónusfánanum. Nokkrum dögum síðar var hann handtekinn eftir að hann hafi verið í vísindaferð á vegum Háskóla Íslands í Alþingishúsinu sjálfu. Hann var þó handtekinn í öðru húsi sama kvöld.

Haukur var handtekinn og dæmdur fyrir mótmæli á Reyðarfirði sumarið 2006. Þar var hann dæmdur til sektar. Í stað þess að greiða hana ákvað Haukur að sitja sektina af sér. Haukur var snemma á síðasta ári boðaður í afplánun. Hann mætti og afplánaði fjóra daga. Á fimmta deginum var honum hins vegar tilkynnt að hlé þyrfti að gera á afplánuninni. Rýma þurfti klefann fyrir öðrum fanga. Því var honum sleppt.

Stjórnvöld viðurkenndu svo að hafa vegna mistaka hjá innheimtumiðstöð sekta og sakarkostnaðar, handtekið Hauk en hann fékk aldrei boð um að hann ætti að hefja afplánun að nýju og var því handtekinn fyrirvaralaust í nóvember. Það er lögbrot.

Daginn eftir að Haukur var handtekinn safnaðist hópur saman fyrir utan lögreglustöðina á Hverfisgötuna. Þeir gerðu áhlaup á stöðina með slíku offorsi að annað eins hefur ekki sést hér á landi. Hauki var að lokum sleppt úr haldi. Það var ekki fyrr en mótmælendur voru búnir að ryðjast inn á lögreglustöðina en því svöruðu lögreglumenn með piparúða.

Að sögn Ragnars, lögmanns Hauks, þá krefst ríkið sýknunar. Aðspurður sagðist Ragnar ekki hafa það á hreinu í augnablikinu hversu háar skaðabætur Haukur krefst en samkvæmt heimildum Vísis eru þær um hálf milljón króna.

Fyrirtaka er í málinu síðar dag.