Minnsta kynjabil heims á Íslandi

Ísland er í fyrsta sæti í vísitölu Alþjóðaefnahagsráðsins um jafnræði kynjanna í heiminum samkvæmt nýrri skýrslu ráðsins. Noregur, sem áður vermdi fyrsta sætið, er hins vegar dottinn niður í það þriðja en Finnland er í öðru sæti og Svíþjóð í því fjórða. Þetta kemur fram í tilkynningu frá Nýsköpunarmiðstöð Íslands. Vísitalan nær til 134 landa og er ætlað að mæla hvernig þjóðir skipta auðlindum og tækifærum milli karla og kvenna. Hækkun Íslands á listanum má einkum rekja til menntunar og þátttöku í stjórnmálum og skiptir þar töluverðu máli að hlutfall kvenna á þingi fór úr 33 prósentum í 43 á því tímabili sem til skoðunar var.

Í tilkynningu Nýsköpunarmiðstöðvarinnar kemur einnig fram að Ísland leiði heimsbyggðina í valdaeflingu kvenna í stjórnmálum en hins vegar sé launamunur karla og kvenna í svipuðum störfum enn mikill og skipar landið 50. sæti listans hvað það snertir og 46. sætið þegar litið er til hlutfalls kvenna meðal hátt settra embættismanna og framkvæmdastjóra.