Ígræðsla líffæra flyst til Gautaborgar

Í dag var undirritaður samningur um ígræðslu líffæra við Sahlgrenska háskólasjúkrahúsið í Gautaborg. Þetta þýðir að líffæraígræðslur Íslendinga flytjast frá Kaupmannahöfn til Gautaborgar um áramótin. Gert er ráð fyrir að samningurinn verði um 18% ódýrari en samningurinn sem nú er í gildi.

Fram kemur í tilkynningu frá heilbrigðisráðuneytinu að samningurinn hafi verið gerður að ósk ráðuneytisins eftir ráðgjöf frá Líffæraígræðslunefnd sem lagði til að gengið yrði til samninga við Sahlgrenska háskólasjúkrahúsið í Gautaborg um líffæratöku og ígræðslu líffæra fyrir íslenska sjúklinga.

Samningurinn er gerður að undangengnum samningaviðræðum við helstu sjúkrahús á Norðurlöndunum, hann gildir til 2010 og er til eins árs í senn, en framlengist sjálfkrafa um ár sé honum ekki sagt upp sex mánuðum áður en hann á að renna úr gildi. Samningur sem hefur verið í gildi um ígræðslu líffæra við Rigshospitalet í Kaupmannahöfn rennur úr gildi um áramótin.

Með samningnum er íslenskum sjúklingum tryggður lágmarksbiðtími eftir ígræðslu líffæra. Biðtími samkvæmt honum er mun styttri en var í fyrri samningi og kostnaður við nýjan samning miðað við tilteknar forsendur um þörf fyrir líffæri er rúmar sex hundruð milljónir króna á ári. Gert er ráð fyrir að samningurinn við Sahlgrenska verði um 18% ódýrari en samningurinn sem nú er í gildi.