Árás í Heiðmörk: „Dómurinn er nýtt áfall fyrir systur mína“

„Þetta er náttúrulega enginn dómur," segir Hrönn Óskarsdóttir, systir 16 ára stúlku sem varð fyrir hrottalegri líkamsárás í Heiðmörk í apríl síðastliðnum, en dómur féll í málinu í dag í Héraðsdómi Reykjaness.

Ákvörðun refsingar yfir þremur stúlkum var frestað í þrjú ár og refsing látin niður falla haldi þær almennt skilorð. Stúlkurnar játuðu að hafa numið fimmtán ára stúlkuna á brott í Hafnarfirði og farið með hana í Heiðmörk. Þar gengu þær í skrokk á henni, meðal annars spörkuðu þær í höfuð hennar. Árásin var fólskuleg. Sjálfar voru árásarstúlkurnar aðeins sextán ára gamlar þegar þær gengu í skrokk á fórnalambi sínu.

„Þetta kom okkur rosalega á óvart," segir Hrönn sem er reið fyrir hönd systur sinnar. Hún segir málið hafa verið höfðað að þeim fjarverandi og meðal annars bar fórnalambið aldrei vitni í málinu.

Hrönn segir að lögregluskýrsla hafi verið tekin af systur sinni strax eftir árásina, en síðar hafi fleiri atriði rifjast upp sem ekki fengu að fylgja með í skýrslunni. „Það rifjuðust fleiri atriði upp fyrir henni nokkrum dögum síðar. Meðal annar spörkuðu þær svo fast í höfuð hennar að hún missti meðvitund," segir Hrönn og bætir við að árásastúlkurnar hafi þá haldið að þær hefðu orðið systur hennar að bana.

„Svo þegar þær sáu að hún var aftur kominn til meðvitundar þá héldu þær bara áfram," segir Hrönn.

Í dóminum kemur fram að allar séu stúlkurnar ungar að árum og ein þeirra hafi farið í vímuefnameðferð. Það er talið þeim til tekna og þess vegna er dómurinn yfir þeim skilorðsbundinn.

Hrönn segir það einnig snúa undarlega að fjölskyldunni að engin bótakrafa hafi verið lögð fram fyrir hönd systur hennar í dómi. Þá segir Hrönn að engin úr fjölskyldunni hafi vitað að málið hefði verið dómtekið fyrr en blaðamaður hringdi í hana og sagði henni frá því. Einnig vissi fjölskyldan ekki að dómur hefði fallið í málinu fyrr en það kom í fjölmiðlum í dag.

„Það hlýtur að vera umhugsunarefni að fórnalömbin séu verr sett en áður en dómur féll í málinu," segir Hrönn en systir hennar er enn að jafna sig eftir árásina. Hún hafi verið hjá sálfræðingi auk þess sem hún hafi haft áfallateymi í kringum sig til þess að takast á við andlegar afleiðingar árásarinnar. Ekki er tekið tillit til þeirra meina í dóminum.

„Dómurinn er nýtt áfall fyrir systur mína," segir Hrönn.

Hún segir næsta mál á dagskrá vera að fara í einkamál við stúlkurnar.