Eignarhald á kirkjum í ólestri

Þinglýsingar á eignarhaldi kirkna og hlunnindum þeirra eru í miklum ólestri. Kirkjuráð hyggst nú freista þess að koma skikki á þessa hluti.

Í bréfi Kirkjuráðs til aðila sem tengst geta umsýslu slíkra mála segir að eigendaskráning kirkna sé í dag afar mismunandi og stundum röng. „Til að hægt sé að þinglýsa kirkju á eiganda sinn þarf að fylgja henni afmarkað land eða lóð,“ segir kirkjuráð og bendir á að algengast sé að kirkjur standi á lóðum í eigu annarra, eins og til dæmis sveitarfélaga.

„Í flestum tilfellum er um það að ræða að þinglýsa eignarheimild kirkju á viðkomandi sókn. Til að svo megi verða þarf að liggja fyrir eignarheimild á þeirri lóð sem kirkjan stendur á, svo sem afsal eða gjafagerningur,“ segir Kirkjuráð, sem kveður þörf á samvinnu margra aðila sem hagsmuna eigi að gæta og nefnir þar sem dæmi sveitarfélög, landeigendur, sóknarnefndir og ráðuneyti.

„Vegna umfangs verkefnisins var ákveðið að taka út nokkrar kirkjur í dreifbýli og þéttbýli og bjóða fram aðstoð við að þinglýsa á réttan eiganda. Með því fæst reynsla af ferlinu og því vinnuframlagi sem heildarverkefnið hugsanlega krefst,“ segir Kirkjuráð.

Kirkjurnar tíu sem taka á út í forathugun eru Dómkirkjan í Reykjavík, Hallgrímskirkja, Útskálakirkja, Hólmavíkurkirkju, Mosfellskirkja, Prestbakkakirkja, Stóra-Dalskirkja, Eyvindarhólakirkja, Stóra-Borgarkirkja og Kollafjarðarneskirkja.- gar