Framlenging útboðs vegna símaþjónustu ógilt

„Það eru gleðifréttir fyrir okkur að þetta ferli sé að virka,“ segir Sævar Freyr Þráinsson, forstjóri Símans, um ógildingu kærunefndar útboðsmála á framlengingu útboðs Ríkiskaupa á fjarskiptaþjónustu fyrir Landspítalann.

Í Fréttablaðinu í júní sagðist Sævar Freyr telja að Ríkiskaup væru að sveigja útboðsreglur í því skyni að geta samið við Vodafone, fyrirtæki sem komið væri í ríkiseigu, um símaþjónustu við Landspítalann til þriggja ára. Vodafone hafði boðið 42 milljónum krónum lægra en Síminn í útboði en uppfyllti ekki skilmála um eiginfjárstöðu áður en útboðið rann út 25. maí. Teymi, móðurfélag Vodafone, stefndi á þeim tíma hins vegar í hendur Landsbankans, Straums og Íslandsbanka með nauðasamningum.

Júlíus S. Ólafsson, forstjóri Ríkis­kaupa, taldi ljóst að þá stefndi í að Vodafone myndi fljótlega uppfylla skilyrði um eigið fé og ákvað að beita undanþágureglu til að fresta því að ganga frá samningum þannig að Vodafone næði að koma stöðu sinni í rétt horf áður. Þetta kærði Síminn.

Kærunefnd útboðsmála bendir á að ekki hafi allir þátttakendur í Landspítalaútboðinu samþykkt að framlengja útboðið. Hún felldi úr gildi ákvörðun Ríkiskaupa um framlenginguna og úrskurðaði að stofnunin ætti að greiða Símanum 400 þúsund krónur í málskostnað.

Sævar kveðst telja að úrskurðurinn feli í sér að semja eigi við Símann um þjónustuna við Landspítalann. Ganga hafi átt til samninga miðað við stöðuna eins og hún var þegar tilboðsfresturinn rann út og að á þeim tíma hafi Teymi ekki uppfyllt skilyrðin.

„ Við erum þess fullviss að endanleg kjör sem Landspítalinn fær verða betri en stóð til boða hjá samkeppnisaðila okkar,“ segir forstjóri Símans.

„Þessi úrskurður er endanlegur, en hins vegar er ekki ljóst hvað hann þýðir. Tilboð okkar var 40 milljónum krónum lægra en Símans og það tilboð stendur enn að okkar hálfu. Boltinn er núna hjá Ríkiskaupum, sem væntanlega þarf að túlka niðurstöðu kærunefndarinnar og ákveða næstu skref,“ segir Hrannar Pétursson forstöðumaður almannastengsla Vodafone.

-gar