Ólafur: Hef engar áhyggjur af Hermanni

Ólafur Jóhannesson segir engar áhyggjur hafa af því þótt að landsliðsfyrirliðinn Hermann Hreiðarsson hafi ekki spilað með sínu félagsliði að undanförnu.

Hermann átti við meiðsli að stríða þegar að tímabilið hófst í Englandi en hann leikur með Portsmouth. Hann sat svo á bekknum þegar liðið lék um helgina.

„Hann er heill heilsu og var brjálaður yfir því að hann var á bekknum," sagði Ólafur. „Hermann er mikill keppnismaður og ég hef engar áhyggjur þótt hann hafi ekki verið að spila. Það væri vissulega ekki verra en ég veit hvernig karakter hann er."

Ólafur sagði að Arnór Smárason væri sá eini sem ekki gat gefið kost á sér í landsliðið en hann er meiddur. „Arnór hefði verið valinn í þennan leik en að öðru leyti er þetta nokkuð hefðbundinn hópur og fátt sem ætti að koma á óvart," sagði Ólafur.

Ísland á enga möguleika á því að komast áfram í lokakeppni HM en Ólafur leggur engu að síður ríka áherslu á leikinn. Hann er sá síðasti hjá Íslandi í undankeppni HM 2010. „Það eru allir leikir mikilvægir og sá næsti er alltaf sá mikilvægasti. Mér skilst á Norðmönnum að þeir ætli sér að spila meiri sóknarleik en oft áður enda mikið í húfi fyrir þá. Þeir hreinlega verða að vinna leikinn."

„En við ætlum okkur líka að vinna leikinn og teljum okkur eiga góðan möguleika á því."