Þörf á frekari úrræðum fyrir fólk í greiðsluvanda

Mikill meirihluti þeirra sem leitað hafa sér aðstoðar vegna greiðsluvanda telja að þau úrræði sem eru í boði dugi ekki til. Viðskiptaráðherra segir þetta rétt og þörf sé á frekari úrræðum.

Ríkisstjórnin hét því að slá skjaldborg um heimilin í landinu og tryggja húsnæðisöryggi fjölskyldna og einstaklinga þegar stefnuyfirlýsing hennar var kynnt síðastliðið vor.

Nokkur úrræði hafa þegar verið kynnt til sögunnar en svo virðist sem þau dugi ekki - til að leysa úr þeim gríðarlega skuldavanda sem fjölmörg heimili í landinu glíma nú við.

Í könnun sem Capacent Gallup gerði fyrir Alþýðusamband Íslands kemur fram að fimmti hver einstaklingur hér á landi hefur þurft á sérstökum úrræðum að halda til að geta staðið skil á greiðslum vegna lána. Könnunin var gerð á tímabilinu 26. maí til 16. júní síðastliðin og var úrtakið 1.248 einstaklingar á aldrinum 18 til 75 ára á landinu öllu.

Mikill meirihluti þeirra, eða rúm 63%, sem nýtt hafa sér úrræði við greiðsluvanda telja sig ekki hafa fengið fullnægjandi úrlausn mála.

Fjölmargir hafa krafist þess að ríkið beiti sér fyrir niðurfellingu eða leiðréttingu skulda.

„Ríkið getur beitt sér á ýmsan hátt til að heimilin fái úrræði og hefur gert það á undanförnum mánuðum og það er búið að kynna margt. En það er alveg augljóst að það dugar ekki og dugar ekki fyrir þá sem eru verst staddir. Þannig að nú er verið að vinna að því að útfæra tillögur sérstaklega fyrir þann hóp, og það er gert ráð fyrir því að þær hugmyndir verði kynntar í þessum mánuði," segir Gylfi Magnússon.