Almarr Ormarsson: Lið hljóta að koma hrædd út á móti okkur

Almarr Ormarsson fór mikinn með Fram gegn Grindavík í kvöld. Hann var áberandi í sóknarleiknum fyrir utan að skora tvö mörk og eiga stóran þátt í sigurmarkinu.

"Var ekki alltaf verið að kvarta yfir því hvað leikir Fram voru leiðinlegir í fyrra? Við ákváðum að bæta úr því og gera þetta spennandi," sagði Almarr um þá markaveislu sem verið hefur í síðustu leikjum Fram í deildinni.

"Fyrsta markið þeirra er klaufalegt, bæði hjá varnarmönnum og Hannesi sem hittir boltann ekki og við dettum niður eftir það en mér fannst við vera með leikinn fram að því. Svo komum við ekki út í seinni hálfleik og þeir fá vafasama vítaspyrnu."

"Við sýndum enn og aftur karakter og klárum þetta, algjör snilld."

"Ég held að það sé komið í huga annarra liða að það sé ekkert gefið á móti okkur. Lið hljóta að koma hrædd út á móti okkur núna. Önnur lið geta farið að passa sig á okkur held ég."

"Þetta er svo mikið klassa lið. Þetta er frábær mannskapur og með liðsheildina í lagi. Ég held að það sé að skila okkur virkilega vel út á völlinn. Það eru engir hetjustælar í neinum eða neitt svoleiðis. Við erum allir saman í þessu."

"Við ætlum að ná okkur í Evrópusæti sjálfir í bikarnum og svo ætlum að klára þessa leiki í deildinni og reyna að klífa ofar í töflunni ef það er mögulegt, við sjáum hvernig þetta spilast," sagði Almarr að lokum.