Nemendur þurftu að skilja eftir allar eigur og hlaupa út

Varaformaður nemendafélags Borgarholtsskóla segir nemendur hafa þurft að rýma skólann á augabragði. Sumir þurftu að skilja bíl- og húslykla og önnur verðmæti eftir inni í skólanum svo rýmingin gengi hratt fyrir sig.

„Skólinn var bara rýmdur og það er enginn nemandi á skólalóðinni," segir Birta Baldursdóttir, varaformaður nemendafélags Borgarholtsskóla. Birta var stödd á skrifstofu nemendafélagsins þegar boðin komu um að rýma ætti skólann. „Ég fór bara í burtu og veit ekki meir. Það er búið að ljúka skólahaldi í dag."

Birta segir að fólki hafi ekki gefist tími til að grípa með eigur sínar á leiðinni út. „Ég veit um fólk sem þurfti að skilja eftir hús- og bíllykla eftir. Það fólk er því nokkurnveginn fast uppi í Borgó," segir Birta sem sjálf náði að grípa sínar eigur með.

Hún segir rýminguna hafa gengið vel og hún sjálf hafi ekki orðið vör við mikið hræðsluástand.