Siv bindur vonir við Írann

„Mér líst ágætlega á þetta. Hann er duglegur og öflugur maður," segir Siv Friðleifsdóttir, þingmaður Framsóknarflokksins og fyrrverandi ráðherra, aðspurð hvernig henni lítist á að Pat Gallagher, rúmlega sextugur Íri og þingmaður á Evrópuþinginu, hafi verið valinn til að fara fyrir nefnd Evrópuþingsins sem kemur að samningaviðræðum Evrópusambandsins við Ísland.

Siv hitti Pat í Þýskalandi sumarið 2003 þegar þau voru bæði umhverfisráðherrar en hann gegndi ýmsum ráðherraembættum á árunum 2002 til 2008. Á fundinum var rætt um OSPAR-samninginn sem snýr að verndun Norður-Atlantshafsins gegn mengun. Á fundinum var tímabundið bann breska yfirvalda við losun óæskilegra efna í hafið frá kjarnorkuendurvinnslustöðinni Sellafield til umfjöllunar.

„Þetta er mikill reynslubolti og hefur komið af mörgum málaflokkum. Hann er mjög viðræðugóður og við áttum gott samstarf um málefni Sellafield," segir Siv sem telur að Pat eigi að geta sett sig í spor Íslendinga þegar kemur að sjávarútvegsmálum.

„Ég tel að það sé afar margt líkt með Íslandi og Írlandi og hagsmunum þjóðanna þannig að ég bind vonir við Pat," segir Siv að lokum.