Ólafur: Við þurfum bara að halda einbeitingunni áfram

Ólafur Kristjánsson þjálfari Breiðabliks hafði ríka ástæðu til þess að vera kátur í leikslok eftir 1-3 sigur liðs síns gegn Stjörnunni á Stjörnuvelli í kvöld.

„Ég er virkilega ánægður með stigin þrjú hér í kvöld á erfiðum útivelli sem ekki mörg lið hafa náð jákvæðum úrslitum á í sumar. Mér fannst við annars hafa fína stjórn á leiknum. Við lendum reyndar í smá áfalli þegar við við missum Arnór Svein [Aðalsteinsson] meiddan útaf um miðjan fyrri hálfleik og það tók okkur smá tíma að vinna út úr því en Guðmann [Þórisson] stóð vaktina vel þar sem hann er ekki vanur að spila bakvörð.

Annars átti öll varnarlínan frábæran leik fannst mér. Guðmundur Pétursson vann líka mjög góða varnarvinnu og eina markið sem þeir skora kemur þegar hann kom ekki aftur. Hann var kannski orðinn eitthvað þreyttur," sagði Ólafur sposkur á svip í leikslok.

Breiðablik er á mikilli siglingu í deildinni eftir að hafa unnið fjóra af síðustu fimm leikjum og gert eitt jafntefli og er enn með í VISA-bikarnum og Ólafur er því eðlilega sáttur með strákana sína.

„Strákarnir hafa verið að vinna vel í allt sumar en þeir vita jafnframt að ekkert er komið núna. Við setjum deildina aðeins á hilluna núna og einbeitum okkur næst að bikarnum. Það er heilmikið eftir í pottinum í deild og bikar og við þurfum bara að halda einbeitingunni áfram," sagði Ólafur.