Alfreð: Við tókum þá bara á þeirra eigin bragði

„Eigum við ekki að segja að við höfum bara jarðað þá í fyrri hálfleik og siglt þessu svo rólega í höfn í síðari hálfleik," sagði markahrókurinn ungi Alfreð Finnbogason hjá Breiðabliki eftir 1-3 sigur liðsins gegn Stjörnunni á Stjörnuvelli í kvöld.

Blikar fóru langt með að gera út um leikinn á átta mínútna kafla í lok fyrri hálfleiks þegar þeir skoruðu þrjú mörk en Alfreð skoraði einmitt tvö þeirra.

„Við tókum þá bara á þeirra eigin bragði. Við lágum aftarlega og sóttum svo hratt á þá og það virkaði vel. Við komumst í 0-3 og ég veit hvað margir sem horfðu á leikinn hafa eflaust velt því fyrir sér hvort að við myndum missa aftur niður forystuna eins og á móti Fram en við vorum einbeittir og héldum haus.

Við höfum unnið vel í okkar málum undanfarið og nú tekið þrettán stig af síðustu fimmtán mögulegum og þetta slys á móti Fram kemur ekki fyrir aftur.

Mér fannst við annars stjórna leiknum vel og sigurinn var aldrei í hættu fannst mér þótt þeir hafi minnkað muninn," sagði Alfreð sem er kominn með ellefu mörk í deildinni með tvennunni í kvöld og í hörku baráttu um gullskóinn.

„Ég er ekkert að spá í þetta og hugsa bara um að spila minn leik og vinna leiki. Allt annað er bara bónus en ég hefði viljað ná þrennunni í kvöld og veit ekkert hvað Óli þjálfari var að spá með að skipta mér útaf. Við þurfum að ræða það aðeins," sagði Alfreð á léttum nótum.