Hvattur til þess að synja ríkisábyrgð á Icesave

Forseti Íslands, Ólafur Ragnar Grímsson, veitti undirskriftalista Kjósa.is viðtökur klukkan þrjú í dag á Bessastöðum. Þetta var í fyrsta skiptið sem forsetinn tekur við slíkri áskorun í eigin persónu.

Um var að ræða hátt í tíu þúsund undirskriftir landsmanna sem höfðu safnast saman á heimasíðunni kjosa.is. Þar er forsetinn hvattur til þess að synja staðfestingar á lögum um ríkisábyrgð á Icesave-reikningunum.

Það var forsvarsmaður kjosa.is, Hjörtur Hjartason auk Sigurlaugar Þ. Ragnarsdóttur sem afhenti forsetanum skjalið. Þá voru nokkrir mótmælendur einnig við Bessastaði vopnaðir mótmælaspjöldum. Þeir voru ekki á vegum kjosa.is að sögn Hjartar.

Aðspurður hvort hann telji undirskriftasöfnun kjosa.is hafa áhrif á ákvörðun forsetans segir Hjörtur: „Ég er sannfærður um þetta hafi áhrif. En ég veit ekki hvað forsetinn gerir en ég vona að hann fallist á þau rök að þjóðin geri út um málið í þjóðaratkvæðagreiðslu."

Þess má geta að mönnum gefst kostur á að skrifa nafn sitt á mótmælendalista kjosa.is þangað til forsetinn hefur staðfest eða synjað lögunum um ríkisábyrgðina.