Fimmtán þúsund manns gæddu sér á túnfiskís og bjórís

Talið er að tæplega fimmtán þúsund gestir hafi sótt Ísdaginn mikla í Hveragerði á laugardaginn. Aðstandendur telja að íslandsmet hafi verið sett í íssmökkun og segja svo virðast sem ókeypis fjölskylduskemmtanir séu í sókn.

Forsvarsmenn Kjörís telja að yfir 40 þúsund ísskammtar hafi verið afgreiddir og um eitt og hálft tonn af ís hafi runnið niður kverkar gesta Ísdagsins um helgina.

Það þarf kannski engan að undra að margir gestanna hafi fengið sér fleiri en einn skammt, enda ýmislegt forvitnilegt á boðstólnum. Á meðal bragðtegunda voru túnfiskís, ís með grænum baunum og bjórís.

Gestir fylltu út spurningalista og völdu bragðbesta ísinn og virðist sem svokallaður Kreppuís hafi vinninginn, en hann er vanilluís blandaður með grjónagraut og kanil.