Iðnaðarmenn að verki

Iðnaðarmenn sem töldu sig eiga óuppgerð vinnulaun frá fyrri eiganda sumarbústaðar í Grímsnesi tóku glugga og hurðir upp í skuld. Þetta kemur fram í yfirlýsingu frá lögreglunni.

Fréttablaðið greindi frá þjófnaðinum á laugardaginn og ræddi við Tinnu Þorvaldsdóttur, núverandi eiganda bústaðarins, sem vissi ekki hvaðan á sig stóð veðrið. Kærði hún málið til lögreglu og biðlaði til þeirra sem vissu um afdrif húshlutanna að gefa sig fram.

Í yfirlýsingu lögreglunnar er ítrekað að þjófnaðurinn tengist ekki núverandi eigendum. Munirnir eru nú komnir í vörslu lögreglu og telst málið upplýst. - fb