Bjarni: Seinni hálfleikur var mjög góður hjá okkur

„Við áttum þarna svart korter í fyrri hálfleik og það fór náttúrulega langt með að klára leikinn," sagði Bjarni Jóhannsson þjálfari Stjörnunnar í leikslok eftir 1-3 tap Stjörnunnar gegn Breiðabliki á Stjörnuvelli í kvöld.

Breiðablik skoraði öll þrjú mörk sín á lokakafla fyrri hálfleiks en Stjörnumenn komu mun grimmari til leiks í síðari hálfleik og náðu að minnka muninn og Bjarni var ánægður með hvernig leikmenn liðsins brugðust við í seinni hálfleiknum.

„Við gerðum breytingar á liðinu í hálfleik og mér fannst þær koma mjög vel út. Við héldum boltanum mun betur innan liðsins eftir þær en við vorum að gera í fyrri hálfleik og mér fannst vera eitthvað slen á liðinu þá og við vorum bara í tómu tjóni með sendingar og annað.

Seinni hálfleikurinn var aftur á móti mjög góður hjá okkur og ef við hefðum spilað þannig allan leikinn þá hefðu úrslitin verið öðruvísi. Við verðum bara að taka þessa spilamennsku í seinni hálfleik með okkur í lokasprettinn í mótinu því þegar menn eru rétt stemdir þá getum við náð góðum úrslitum," sagði Bjarni að lokum.