Notkun róandi lyfja hefur ekki aukist í kreppunni

Engin aukning hefur orðið í notkun róandi lyfja í kreppunni. Þetta kemur fram í úttekt Landlæknisembættisins sem hefur borið saman notkun geðlyfja fyrstu sjö mánuði þessa árs miðað við sömu mánuði undanfarin ár.

Á vef embættisins kemur fram að notkun róandi lyfja hefur minnkað lítillega. Þar segir jafnframt að óveruleg aukning hafi verið á tímabilinu á notkun svefnlyfja. Bent er á að hafa verði í huga að sú notkun hefur aukist ár frá ári og að aukningin milli 2008 og 2009 sé minni en hún hefur verið undanfarin ár. Svipaða sögu er að segja af notkun þunglyndislyfja.

Samkvæmt bráðabirgðatölum um sjálfsvíg fyrstu sjö mánuði þessa árs eru þau svipuð að fjölda og var á sama tímabili í fyrra.